مش ممكن أكون إنت
ولا ممكن تكون أنا
دا رب الخلق سوانا
روحين .. وجتتين إتنين
ولما الموت هيجي
والميعاد جاي جاي
دا عمر ملك الموت
ما يخالف الأقدار
هنرحل روحين
نتحاسب روحين
في الجنه أو في النار
تكون أو أكون .. نكون إتنين
فكون حيث الإله أمرك
وابعد عما نهاك فعله
بلاش أناك الموحشه جوه هواك
الشهوه قهوة مزاج وقتي
وانا وقتي مش خالص من الأهوال
ولا وقتي مرهون على وقتك
الوقت سيف بتار يقطع رقاب العمر
يقفل عليه ما يبان جوه تابوت الموت
ما املكش غير صباح النصح من قلبي
وافرش نهاري شموس ما تغيب على الأحباب
وفاتح ضلفتين قلبي لكل شريف
الوقت شكله مخيف ومراره واقع متهم بالعيب
احنا نسينا نفسنا والا اتنسينا
ساعة ما نبدأ عمل ننهيه بشكل مريع
حتي إللي سابه جدودنا بندوس عليه بغباوه
هوه إحنا ناس ولا إحنا حمير ننساق
ملعون أبوك يا سكات تقدر ولا تقولشي
قرفنا من تطبيل وزمر م المخابيل
أمات نفوس سوده عايشه في بير الخوف
عايشين عصا لنمرود بيذل نفس الخلق
والحق نام في قلوب واتغطى بيشخر
صدا ميزان العدل والكف مقلوبه
مغلوب يا طير الخير مغلوب على أمرك
مطرود ياليل مطرود مهما يطول وقتك
لا فيه جنود تحميك يوم ما القدير يإذن
ربك بيمهل قوي سبحانه ما بيهمل
ياخدك ياليل مفتري أخذ العزيز مقتدر
الفجر جاي بميعاد جايب في ايده الصبح
وتقوم قلوب الخلق وتصحى كلمتها
تعلى لفوق السما وتهد كل جهول
وتزيح غيام البؤس من نفس كل ذليل
يا الصابرين صحصحوا لما الأدان يدن
خليكوا له جاهزين واتوضوا بالهمه
خليكوا شعلة نور تخرق عيون الليل
......
...
..
نبيل مصيلحي
