ناي الحزين اليتم الرفيق
ليه دايمأ بيحلالك
تشد الدمعه من عيني
وانا منك أعز صديق
قريب وحبيب
وليه غاوي تغرفني
في بحر الحزن
وتفوتيني
لدوامه ما ترحمني
وتحدفني لشط غريب
وامشي أتوه
في كل طريق
ناي الحزين اليتيم الرفيق
صحيح الدنيا ما بقتش
كما رايد نعيش فيها
ولا قادر تعيش حلمك
ما أنا زيك جناحي
م الحمول
عاجز
يشيل حملي وحمل الناس
واطير بيهم
واطلع فوق نشوف الدنيا
ونقرر مصايرنا
خلاص الزحمه منصوبه
في كل مكان
وناس دمعها نازف شكاوي
ونوح
ولا قادره تعيش يومها
وحال قاسي يشد هدومها
بيقطع هلاهيلها
يعريها ويجرحها ويرميها
ياريت الصبح كان هدمه
عشان يحميها يسترها
مفيش فايده
في صبح وهين
وراكب وهم ماله حدود
وسيفه من كلام فاضي
من المعنى
أنا يا ناي ما عاد ليا
مراره اصبر
ولا عاد غير الأنين موال
وكل الناس على دا الحال
في تواهه..
صحيح الدنيا نداهه
نعيش الغربه جوانا
فكون ياناي لنا فرحه
ولو بالكدب
واعزف بالحنين
موال
يقوم الصبح في رحالنا
ونتوضا بأحلامنا
نعيش أحرار
من الليل اللي ساكنا
ورا القضبان
وحارمنا نعيش يومنا
أمانه يا ناي كفايه عذاب
ويالا اعزف لنا فرحه
ترد الروح
--
نبيل مصيلحي
