بالعند ف البامية
**************
هجيب لي دولاب م الفضية
والشمس الطارحة الصبحية
راح اقولك لأه يا عينيا
مش عايزة غير الملوخية
هجيب لي سرير حلو بعمدان
وغويشه ودبلة وكام فستان
مش هتشوف مني أى حنان
غير لما تجيب الملوخية
هتجيب لي معاك امك وابوك
وجيران الحتة اللى يساندوك
مش هسمع ليك ولا للي جابوك
غير لما تجيب الملوخية
هتجيني تقول مشتاق يا جميل
وتجيب وياك دستة مناديل
قلبي المشتاق عمره ما هيميل
غير لما أشوف الملوخية
هتجيب بوفتيك او ربع كباب
مش هفتح ليك والنعمة الباب
وهقول للناس انك كداب
واعملك .....ف القسم قضية
لا انا بنت زوات ولا م الكتكات
وماليش ف الفيس ولاحتى الشات
انا بنت الريف دمي شربات
مولودة ف حضن الشرقية
دانا امي زمان قالت يا حنان
لو عاوزه تعيشي ف حضن أمان
اختاري عريس طيب غلبان
بيحب يعوم ف الملوخية
وان كنت عاوزني افضل ليك
واقول لك ليل ونهار شوبيك
هات لي وياك أرنبة أو ديك
اعملهم .. ويا الملوخية
مش عايزة غير الملوخية
مش عايزة غير الملوخية
**************
رضا أبو الغيط
