البركه تحسها وتشوفها
في الخضره الطازه المنديه
في الوفره وخيرها المرتاح
في السكنه أما تكون في براح
في عيالك صبيان وبنات
وقلوبهم مليانه حنيه
ومراتك بتكون وقفالك
أم وأخت وزوجه وفييه
مصروفك بيكفي البيت
ولا يقسم ضهرك دكتور
واللقمه لو كات بالملح
بقناعتك راح تمري عليك
دي البركه في العرف السايد
لحياة الإنسان في الدنيا
وبتجري بينا الأيام
تتغير فينا ملامحنا
وشبابنا يعزل ويسيبنا
وبياخد وياه الحركه
كنا أربعه دار بينا حديث
في المعنى الآخر للبركه
بس حديث له طعم لذيذ
قزقزنا الضحك بنتسلى
قالوا إيه بعد الستين
الراجل بيسلم حاله
ويعيشها قطه في البيت
أو نجفه حليوه ملاليه
والالفه بتصبح مواله
لا ضحكه بتهز كيانه
يتشاقى كما إنه شباب
ويحرك ديزل قدامه
ولا يركب عجله مطاطيه
ودا صنف بيتقاله يا بركه
والست بتكرهه على حاله
فيه قالوا الست اللي تسبب
للراجل فك لاعصابه
فلا كلمه ناعمه وملاغيه
ولا لمسه مليانه حنيه
تتحول كما لوح التلج
فيعيش الحرمان الظالم
وتموت الوقفه
الثوريه
...
نبيل مصيلحي
