أغلى من كل الكنوز
ــــــــــــــــــــــــــــ
شعر / نبيل مصيلحي
ـــ
في عيون المجد .. شوفها
شوف رجالها .. شوف جنودها
بص هتلاقي الشموخ
نعمه فوق كف الحياه
مين يصونها .. غير ولادها
متبسمه للطهر .. طاهره
متنسمه بعبير .. مشالله عليه ..
وشايله فوق كتافها ..
دنيا حلوه ..
فوق جسور الصعب عبرت
مصر وهبه م الإله
مصر جنه وطوق نجاه
يا عيون الدنيا بصي ..
( النيل ) بيحكي للوجود سر الحياه
مصر محبوبته وعشقه
مهما طاله الشر كفـُّه
كان كريم ..
عمره يوم ما كان بخيل
حتى للي في يوم أذاه ..
.. أو عاداه
مصر زي النيل قويه
بقلب طيب ..
صافي زي حليب في ( مترد )
جاموسة ستنا / قرية بلدنا من
مصر لوهمست بشالها ..
شوق هتبعت للحبايب والجيران
من حرير الكون نسيم
مصر شربت م المحن
قوه وإراده ..
والسياده تاج على راسها يلالي
مصر ( غاده ) ..
من بساتين الخيال
قوه أعتى م الجبال
شوف تاريخها ..
بص شوف الأهرامات
التاريخ جوه المتاحف
إيزوريس .. اخناتون
الفراعنه جدود أمينه
فاتوا كل عظيم مناره
شوفوا ( أحمس ) .. شوفوا ( مينا )
شوفوا كام محتل حل
ولم يحل المسأله
شعب مصر المعضله
شعب قادر يهزم المحنه
يسوقها لأي خـيِّه
مصر في اكتوبر ..
بتولد معجزه
تكبر في عين كل العدا
جيش وشعب
يقوم يلبي لها الندا
وفي أغسطس .. سته منه
ألفين وخمستاشر تمام
مصر شقت بالإراده
قناه جديده
وليد كبير ..
القناه ..
والحلم أكبر
ألف مليون ألف دنيا
في عيون حاسد وحاقد
أو محرِّض أو مشكك
أو عميل بايع كرامته
مصر أمي وأم كل الإنسانيه
مصر لو تعرفها حقـَّه
تلقى فيها كل حاجه
حضنها ساع الكتير ..
حبة الرمل اللي فيها
أغلى من كل الكنوز
اللي يعشقها ..
يدوب في قلبها
ــ
