هيثم القليوبي.. بمناسبة عيد ميلاده
--
أيام ورا أيام والعمر بيعدي
قطر الحياه ماشي في سكته دوغري
لا باختياره يوقف ولا باختياره يسير
مجبر على شيلته مأمور ومتسخر
بيوصل الأنفاس لآخر المشوار
وقت القدر تطلع م الجسد روحها
طريق خلاص انتهى ولا فيش رجوع منه
فالدنيا دي فانيه عليها الكل فان
عرفت فيها كتير دنيا ماليها أمان
عرفت فيها الخاين والوغد والغدار
وصاحب المصلحه ويا الجبان الفار
واللي بتاكله الأنا وتقيد في قلبه النار
وخسيس في وقت العطا يديك قفاه وضهره
الدنيا فيها كتير ما يسوى نظرة عين
وفيها إبن الأصول الراجل المجدع
تلقاه في وقت المحن جنبك ما يتزحزح
يمسح عينيك م البكا يهدد على كتفك
ويشيل عنك هموم لو بالكلام ترتاح
يا نفسي ما تخبي قومي اذكريه قولي
اسم الأصيل "هيثم " والنقب "قليوبي"
القلب زي الحليب خالي من الادران
والعقل فيه الدهب واللولي م الأفكار
إنسان كريم حاتمي وعطيته في السر
لا شوفت فيه الغدر ولا الخيانه لحد
ولا كان في يوم مغرور ولا حقود وحسود
أنا شوفت فيه نفسي قربته من روحي
وفتحت له قلبي يدخل بلا استئذان
ابني اللي ما خلفته وفرحت بوجوده
أصل بصراحه صعب انك تلاقي اتنين..
على شكل "قليوبي"
--
نبيل مصيلحي
