إنت الكبير .. مهداه إلى شاعر مصر الكبير.. إبراهيم رضوان
--
العدل في الميزان لو الميزان معدول
لو الميزان قايم في عيون تحب النور
أما القلوب السوده معقوده بالأوهام
مليانه بالغيره والحقد والأصنام
يجي الزمان ويروح ياخد معاه ما يسيب
لا قرد فوق شجره ولا فرخه في عشه
ولا شهرزاد فضلت لشهريار وناس
فرعون عتى في الأرض
ومات غريق البحر
وابرهه الحبشي عفن على فرشته
وبالنعال مات أعتى ملوك الأرض
الموت ما بيخليش لا فيل ولا كتكوت
طب ليه بنتعارك نخلق مشاكلنا
ونشيل في أنفسنا هم الحقود والشين
خلينا زي الصبح ما يهمه عتمة ليل
خلينا زي الفجر يفصل ما بين البين
خلينا اسطوره تعيش على الأزمان
يا عمنا المظلوم في زمان ماهوش زمنك
إنت ابراهيم رضوان زمنك عطاك نقبك
إنت الكبير فينا.. إنت الكبير لينا.. إنت عبير الشعر
إنت إللي قولت زمان وقت الشدايد مدد
إنت إللي فينا بان في القايمه أولنا
إنت القمر من فوق على عصرنا باين
وقولت أجمل قول .. وحيات رب المداين
وكتير من الحواديت الحلوه في الاشعار
غنت منى ومنير وشاديه ونجوم مصر
ونوح ما سابك يوم ولا فات جميل شعرك
إنت إبراهيم رضوان حبسوك عشان الحق
ضحيت عشان النور يفضل لنا عنوان
يا أمير بحق القول للشعرا في زمانا
معرفش ليه الغل واكل قلوب البعض
معرفش ليه الحقد في لحمنا بيعض
معرفش ليه الحسد ورانا فين ما نروح
الناس دي ليه مقرفه قرفانا بوجودها
يا عمنا يا كبير سيبك من الهلافيت
أمات كلام معيوب وحنجره طبله
بيطبلوا بالخرف والحرف مات فيهم
من جهلهم قالوا والقول هبل مجنون
ولو أن فيهم عدل هيقولوا صح القول
ويعدلوا الأوزان
ويشهدوا بالحق ويعلو فوق رضوان
معلش يا عمنا خلي العيال تلعب
حجرك يسيع لعبهم ويكفي اضعافهم
يا عمنا بالله انسى ما كان منهم
ولا تنشغل إلا بقلب بيحبك
خليك مع الرحمن هوه العظيم قهار
سلم أمورك ليه صاحب المدد يرضيك
وتنول معاه الخير وجنة الرضوان
يا ابو قلب زي العسل
فيه إبراهيم رضوان
--
نبيل مصيلحي
