باتمنى إن أنا وانتوا نكون حمام سلام طاير في السما
حابب مجاله .. دياره .. وكل ما في الوطن
عاشق وزاده جوه قلبه حب ماله مدى أو حد
يحد الانتما والوصل
باتمنى تبقى مصر حدوته حلوه في لسان الخلود
بتطل دايما م المشربيه شمسة الأكوان
وباحبها تبقى عروسة كل صبح جميل
وباحبها ع الترعه تتمشى يميل عشاقها بالمواويل
الخضره في عيونها والصباح الأصيل والليل
شايله الحنين في الكفوف خير الله
بتوزعه ع الكل
بتمنى إن انا وانتوا نعيش في نهارها الفل
باتمنى .. والأمل حبة حياه في القلب له سطوه
والخطوه قويه بتشد ١٠٠ فجر لحضنها يسكن
اااااه لو نكون اقوى م الجبال في وش الرياح والغدر
وكف أقوى م الزمان يعصر في المحن عصر
باتمنى أنا وانتوا نبقى طيبين جداً
نبقى ملايكه فوق جبين الأرض
مصر الوطن والشرف والعرض
فرعون قارون نمرود طغى والكل مات وهيه ما بتموت
الكل بيسجل تاريخه ع السطور ضلمه كانت أو قمر ونجوم
.........
نبيل مصيلحي
