أصدق مين والوشوش ماسكات
غاويه تكون متشخبطه متاهات
غاويه تهون في الأنا وتنام
غاويه تبيع نفسها لشتات
الصبر يا رب الورى
أنا عشت دايما مبتلى
أيوب في قلبي انجرح واتاذى
لكني لساني الجبل ما يلين
حتى إن بقيت وحدي
ما أنا اللي رافض انحني
مهما انحنى غيري
وهاعيش كدا
زي الشجر لو مات يموت واقف
ملعون ابوك يا سكوت
يا شانق الكلمه ودافنها جوه تابوت
سوق النخاسه اتفتح بابه اتملا تجار
والبيع بقى في العلن ومزاده أصبح نار
قرب .. معدش فيها ضمير
قرب .. معدش فيها كبير
قرب .. يوسف مازال في البير
قرب .. الحب قلبه ضرير
وقابيل بقى شاهبندر وعترة التجار
مابقتش قادر اشوف
أصل المدى مزحوم
بمواكب الفجار
....
نبيل مصيلحي
